Eskulangileen berrehun bat saltokik eta erakustokik beteko dute asteburu honetan Gasteizko Erdi Aroko azoka. Ostiralean hasi eta igandera bitartean, lanbideen erakustaldia egingo dute errementari, zurgin, urregile, beiragile, okin zein upelgileek garai bateko azoka irudikatzeko, eta antzina bezala, kultura kristaua, arabiarra eta judua bizikide izango dira. Azoka giroan, antzezpen, malabare, txotxongilo, zuzeneko musika eta su zein falkoneria ikuskizunak ez dira faltako.
Berrikuntzen artean, gainera, Erdi Aroko torneoak izango dira Buruileria plazan, haurrentzako pintura eta mozorro lehiaketa, eta argazkigintza saioa izango dira. Kultura desberdinetako platerak dastatzeko aukera izango da, halaber, 14:00etan egingo dituzten gastronomia saioetan. 30 antzerki, musika eta zirko konpainak baino gehiagok girotuko dituzte Erdi Aroko kaleak, 8.000 apaingarri eta 300 saltoki baino gehiago izango dituzten kaleetan.
Ostiralean, 19:00etan, izango da irekiera jaialdia, Iñigo Salinero Txaflas aktorearekin; Aihotz plazan izango da, eta hortik aurrera Santa Maria plazan, Euskaldunberri plazan, Etxanobetarren etxeko lorategian, Martin Ttipia plazan, San Miguel balkoian eta Buruileria plazan izango dira ekitaldian, kalez kalekoekin batera. 24:00etara bitartean izango da azokaz gozatzeko aukera, eta 11:00etatik aurrera ekingo diote larunbat eta igandean.