Piztear dira aurtengo amarruak

Erredakzioa 2017ko ira. 10a, 13:00
Asier Kidam Gasteizko magoak ekarriko die gasteiztarrei euskararen magia. Irudia: Asier Kidam

Bihar 29. Magialdian murgilduko da Gasteiz, errealitaterik harago doan munduan bete-betean sartuta. Ikuskizunez gain, lan jardunaldiak izango dituzte gurera iritsitako magoek, baina sekretu profesionala mantenduko dute. 

Pertsona bat balitz, gaztetasunetik heldutasunera igarotzeko bidean dagoela esango genuke. Izan ere, aurten 29. ediziora heldu da Gasteizko Magialdia. Astelehenean hasita, eta astebetez, arabarrek tentuz ibili beharko dute errealitatea eta amarrua bereizi nahi badituzte. Edonon azaldu daitekeelako magia: Gasteizko edozein kaletik ibiltzean edo lagunekin afaria egitean. 25 agertokitan  loratuko da magia, 75 ikuskizun ezberdinetan. 

Aurten, ordea, hausnarketarako tartea ere izango dute magoek, eta horretan magia egitea ez zaie nahikoa izango. Europa biltzar aretoan arituko dira magiaren munduari lotutako adituak, agian ahopeka, maisuen arteko trikimailuak elkarbanatuz. Tarte hori baliatuko dute ere hainbat liburuen aurkezpena egiteko. 

Benetako magia izan dadin, ilusioa eta kemena jarriko dituzte  magoek aurtengo gala solidarioan. Oraingoan, Nahia Garcia umearen alde egingo dute; hitz egitea eragozten dion sindrome epileptikoa du haurrak, eta magia hutsaz gain, bestelako laguntza behar du. Nork esan du ba magia ez dela existitzen?

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide