Aurten ere, Zeledonen jaitsiera San Migeleko balkoitik ikusteko gonbidapenak zozketatuko ditu Udalak, eta bihar izena emateko epea zabalduko da. Guztira, 50 gonbidapen-txartel bikoitz banatuko dituzte.
Norbanakoentzako paseez gain, hiriko talde eta auzo-elkarteentzat eta baita gizarte eta kultura eragileentzat ere egongo dira gonbit-txartelak.
Izena emateko epea uztailaren 7tik 18ra arte izango da, biak barne, eta webgunearen bidez edo 010 zein 945161100 telefonoetara deituta egin ahal izango da izen-ematea. Gonbidapena eskuratu ahal izateko, galdetegi bat bete eta izen-deiturak eta NAN zenbakia eman beharko da. Horrela, pertsona bakoitzak bi gonbit-txartel jasoko ditu. Horrez gain, ezinbestekoa da adin nagusikoa izatea eta Herritarren Udal Txartela (HUT) edukitzea.
Zozketa
Gonbit-txartelak uztailaren 21ean zozketatuko dira, 8:45ean, San Martineko udal bulegoetako entzunaretoan. Egun berean, 13:30etik aurrera, 50 irabazleen eta 10 ordezkoen NAN zenbakia jakinaraziko da.
Irabazleek uztailaren 28an eta 31n jaso ahal izango dituzte txartelak, 10:00etatik 20:00etara Plaza Berriko Turismo Bulegora gerturatuz eta NANa aurkeztuta.
Izena emateko: Zeledonen jaitsiera San Migeleko balkoitik ikusteko paseen zozketa