Latinoamerikako biribilgunea lurperatzea izan da proposamenik bozkatuena Gasteiz Hobetuz programan. 2.243 lagunek botoa eman dute; hamabost proiektu izango dira datorren urteko Udaleko aurrekontuan sartzeko. Bozkatu duten herritarren %20,37 proiektu honen aldekoak izan dira.
Bigarren proiekturik bozkatuena Errota kalea birmoldatzea izan da botoen %12,7ko babesarekin. Estu geratu da zerrendako hirugarren proposamena, Borinbizkarran eta Elejalden jolastokiak jartzea (%12,1).
Latinoamerika, Adurtza, Arana eta Txagorritxuko eremuetan izan da partaidetzarik altuena. San Prudentzio, Angulema, Alde Zaharrean eta landa eremuetan, ordea, parte-hartze baxuena.
Udal gobernua, pozik
Isabel Martinez, Partaidetza eta Gizarte Etxeen zinegotzia, baikor azaldu da programaren emaitzak aurkeztu dituenean, eta adierazi du herritarren partaidetza “loteslea” izango dela. Ildo honetan, boto-emaileen aniztasuna azpimarratu du. Izan ere, proposamenak gai oso ezberdinak tratatzen dituzte: Ingurunea, hiriaren hobekuntza, segurtasuna edota aisialdia.
Gasteizko auzokideek irailaren 26tik urriaren 9ra bozkatu ahal izan zuten. Bozkaketa egin zuten datorren urteko udal-aurrekontuaren zati bat zertan inbertitu jakin ahal izateko. Hori egiteko bi bide zeuden, presentzialki edo sarearen bidez egin.