EH Bilduk 2017ra begira OHZ (Ondasun higiezinen zerga) proposamena mahai gaineratu du gaur goizean eta gaur arratsaldeko 16.00etan udaletxean ospatuko den Zerga arloari buruzko batzordean aurkeztuko du.
EH Bildu udal taldearen esanetan, "2016an, era ezkutuan, Babes Ofizialeko Etxebizitzei OHZ zerga igo zaie. Zentzu honetan, gaur arratsaldeko ponentzian gaia aztertutako da, EH Bilduk hala eskatuta, eta bertan egoera konpontzea espero da". Horrez gain, EH Bilduk eztabaida orokorra eskatu du, zergen planteamendu osoa eta justua egin ahal izateko. Zentzu honetan, Miren Larrionek gobernuak mahai gainean jarritako egutegiaren aurreko zalantzak agertu ditu, bertan ekainerako behin behineko onespena aurreikusten da. “Eztabaida zatitzea eta azkar batean erabakiak hartzea hiritarren aurka doa, eztabaida osoa planteatzen dugu”.
Iritzi berekoa da Irabazi udal taldeak. Ohar baten bidez adierazi du ez duela zergen gaineko arauen aldaketak zergaz zerga egitea eta fiskalitatea bere osotasunean aztertzea eskatu du.
EH Bilduren proposamenak
2017ko OHZren inguruan, EH Bilduk mahai gainean jarritako proposamenak diru bilketa mantentzea lortzen du, "eta modu honetan kalitatezko zerbitzu publikoa bermatu, zerga progresibo eta justuago baten bidez." Horretarako, Gobernuak duen marrazkiaren gainean aldaketa sakonak proposatu ditu. EH Bilduk bi tipo mota egotea berreskuratu nahi du. Alde betetik, etxebizitzena eta bestetik etxebizitzak ez direnak eta gehien balio duten % 10etarako. Pertsonentzat, EH Bilduk 0,32 %a planteatzen du, modu orokorrean aurtengoaren berdintsua edo pixkat gutxiago izango zena; eta bestetik enpresa eta bankuentzat % 0,41a. “Enpresa eta bankuei egindako presio handiago honek familia eta pertsonen zerga lasaitzea ahalbidetzen du”, azaldu du Antxon Belakortuk.