Gaur goizean EH Bildu udal taldeak elektrizitatea kontratatzeko baldintza berriak proposatu ditu Amvisako kontseiluan eta plegu elektrikoetan egin beharreko aldaketak mahaigaineratu ditu, Iberdrola eta Endesak duten “blindajea” apurtzeko. Udal taldearen ustez, kontratazio eredu berriak egungo egoera konpontzen du. Egun, udalean urteetan onartutako baldintzekin Iberdrola edo Endesa bezalako enpresek negozia bermatuta zuten. EH Bilduko Aitor Miguelek azaldu du “egun arteko baldintzek enpresa hauen negozioa babestu eta, aldi berean, kooperatiba energetikoentzat saihestu ezinezko oztopoa izan direla”.
Udalbatzak behin baino gehiagotan adierazi du egoera hau konpontzeko nahia, baina, Miguelen esanetan, beti jartzen ziren “aitzakia juridiko eta teknikoak”. “Dakartzagun planteamendu honek Udalaren Ikuskari Nagusiaren oniritzia dauka”, gaineratu du.
Udal taldeak proposatu dituen baldintza berrien artean, kontratua ataletan banatzea dago; “Europako Direktibak dionez kontratuen neurria enpresa txiki eta ertainen gaitasunera egokitu behar dira”. Bestalde, EH Bilduk bermeak kentzea proposatzen du,” ez zeukatenak inongo zentzurik hornitutakoa ordaindu baino lehenago ematen baita. Horrez gain, kaudimen ekonomiko, finantzero, tekniko eta profesionalak aldatu dira, orain arte transnazionalen neurria eginda zeudenak. Azkenik, esleipen prozesuan ingurumen aldeko baldintzak eta baldintza sozialak sartu dira”.