Gasteizko Udalak “garai berrietara” egokitzeko urratsa egin du eta salmenta ibiltaria arautzeko araudia egokitzea erabaki du. Horrela, espazio publikoan merkataritzako formula berriak erabiltzeko aukera emango du eta food-truck-ak bezalako saltoki-ibilgailuak kalean jartzeko aukera egongo da. Horrekin batera, salmenta ibiltarian aritzeko baimenen iraunaldia luzatuko dute, hiru urtetik lau urtera.
Saltoki-ibilgailuak edo antzekoak baliatzeko deialdi publiko bat egingo da, eta bertan zehaztuko da zein lekutan jarri ahalko diren eta zein baldintza bete behar den dagokion baimena eskuratzeko. Orain arte, esaterako, food-truck direlakoak espazio pribatuetan baino ezin ziren garatu.
“Baimenen kudeaketa hobetzen da, eta jarduera horretan dabiltzanei egonkortasun handiagoa ematen, denbora gehiago izango baitute inbertsioa amortizatzeko”, azaldu du Borja Belandia alkateordeak.