Udalak ia milioi erdi euro emango ditu aurten hiriko merkataritza eta ostalaritza modernizatzen eta enpresa berriak ezartzen laguntzeko. Izan ere, Gobernu Batzarrak gaur goizean onetsi ditu merkataritza, ostalaritza eta zerbitzu pertsonalen alorretarako laguntza-deialdiak eta oinarriak.
Batetik, 2016an Gasteizko merkataritza eta zerbitzu pertsonaletako enpresa txikiei laguntzeko programaren deialdia onetsi du, “enpresa berriak ezarri eta daudenak modernizatu daitezen sustatzeko. Sustatu nahi dugun beste ardatzetako bat ekintzaileen kultura da”, azaldu du Enpleguaren eta Garapen Ekonomiko Iraunkorraren zinegotzi Nerea Melgosak. Programa horretarako 300.000 euro bideratuko dira.
Bestetik, Gasteizen ostalaritza-enpresa txikiak ezarri eta modernizatzeko laguntzak emateko udal programaren deialdia onetsi du udal gobernuak, 196.627,83 euro izango dituena.