Gasteizek izapideei hasiera eman die herritarrek osoko bilkuran mozioak aurkezterko aukera izan dezaten talde politiko baten bitartekaritzarik gabe, orain ez bezala. Talde politiko guztiek onartu dute Udalbatzaren Araudia aldatzeko tramitazio egutegia, herritarren partaidetza zuzena ahalbidetzeko.
Modu honetan, Gasteiz Euskadiko lehen udala izango da beharrezko aldaketak egiten dituena, taldeek edo elkarteek mozioak zuzenean aurkezteko aukera izan dezaten. Batetik, partaidetza-organoetan egiten diren proposamenak dagozkien batzordeetan eztabaidatzeko aukera eman nahi da; bestetik, osoko bilkurako herritarren txandan mozioak zuzenean aurkezteko bide eman, talde politiko baten bitartekaritzarik gabe.
Gaurtik aurrera talde politikoek zuzenketak aurkeztu ahalko dituzte. Ondoren, araudiari hasierako onespena emango zaio Udalbatzan, eta jendaurreko erakustaldia zabalduko da, herritarrek alegazioak egin ditzaten. Azkenik, behin betiko onartuko da.