Miguel Asurmendi gotzain ohiak erretiroa hartuta, Arabako fededunek artzain berria dute: larunbatean ordenatu zuten Gasteizko elizbarrutiko apezpiku Juan Carlos Elizalde nafarra (Mezkiritz, 1960), leporaino betetako Maria Inmaculada Katedral Berrian. Bere homilian, "pobreekin, etorkinekin eta baztertuekin" egoteko konpromisoa adierazi zuen, baita "bakearen alde" lan egitekoa ere.
Mahai-gainean izango ditu, besteak beste, elizak jabetzan hartutako ondasun publikoen auzia (inmatrikulazioak) eta Zaramaga auzoko San Frantzisko eliza biktimen omenaldietarako erabiltzeko baimena modu egonkorrean emateko eskaera.