Azken urteetan lau kontzertura mugatu ondoren, bost emanaldi eskainiko dituzte berriro ere aurten Matxete plazan, Gasteizko Jaietan. Egitaraua aurreratu, eta uztailaren 30ean hasiko da festa giroa berotzen Aihotz enparantzan. Egun horretan irekiko du bertako txosna Gasteizko euskaltzaleen Geu elkarteak, eta iluntzean eskainiko dute aurtengo egitarauko lehenengo kontzertua: Kodigo Norte hip hop talde gasteiztarraren emanaldia, hain zuzen.
Abuztuaren 5ean, Jon Basaguren abeslari eta gitarra-jole iruidarraren Izaki Gardenak boskoteak hartuko du lekukoa, pop, rock eta country doinuekin. Larunbatean, ordea, Gontzal Mendibil musikagilearen txanda izango da (egun berean Esne Beltzak joko du Foru enparantzan). Funky, jazz eta soul ikutuko kantak izango dira hurrengoa, Sorkun errenteriarraren eskutik. Amaierako kontzertua Skakeitan ska-punk bandak eskainiko du, abuztuaren 8an (astelehena).
Foru plazan, rock zaharra eta pop berria
Zeledon jaitsi eta ordu batzuetara Mikel Izal gasteiztarraren pop eta indie-rock boskoteak irekiko du Foru enparantzako emanaldien aurtengo zerrenda. Andre Maria Zuriaren egunean, abuztuaren 5ean, talde arrakastatsu batek hartuko du lekukoa: DVicio pop-rock taldeak. Euskarazko kontzertuaren txanda larunbatean izango da (urtero bakarra eskaini ohi dute). Zehazki, Esne Beltzak jarriko ditu dantzan gasteiztarrak eta bisitariak. Azken bi kontzertuak, 7an eta 8an, ibilbide luzeko bi taldek eskainiko dituzte: Reincidentes punk-rock talde andaluziarrak eta zelta kutsuko rocka egiten duen Celtas Cortos banda ospetsuak, aurretik ere biak Foru enparantzan egondakoak.