Global Sumud Flotillako ekintzaileek protesta egin dute asteburuan Samaniegoko jauregian eta Macan upategian, Sionistak kanpora lelopean.
Palestinarren aldeko ekintzaileek salatu dute bi eraikin horiek Rothschild familiarenak direla eta familia horrek "harreman historikoak" izan dituela mugimendu sionistarekin eta Israelgo Estatuaren sorrerarekin. Hala, adierazi dute ez dutela nahi "estatu genozida bati laguntzen dion enpresa edo familia sionistarik Euskal Herrian".
Samaniego jauregiaren aurrean bildu dira hasieran ekintzaileak, eta ondoren Macan upategira joan dira. Ertzaintzak protestan parte hartu duten lagunak identifikatu ditu. Plataformak gogoratu duenez, Euskal Herrian egin duten bosgarren ekintza da.
Iragan apirilaren 30ean Israelek flotilla geldiarazi zuen, eta 177 ekintzaile atxilotu. Saif Abukeshek eta Thiago Avila izan dira aske geratzen azkenak: Israelek igandean goizaldean deportatu ditu. "Saif eta Thiago askatu dituzte, baina 9.000 bahituetatik azkena askatu arte jarraituko dugu", azpimarratu dute Samaniegon bildutakoek.