Santanderreko (Kantabria) hondartza batean bost lagun hil diren istripuan bizirik atera den pertsona bakarra Elvillarreko neska bat da, biktimaren inguruko iturriek ALEAri baieztatu diotenez. Elvillartar gaztea ebakuntza baten zain dago uneotan Marqués de Valdecillako (Santander) ospitalean, baina, antza, arriskurik gabe. "Mirari bat izan da", esan du neskaren inguruko iturri batek.
Atzo arratsaldean itsasoaren aldamenean erreka baten gainean zegoen egurrezko pasabide bat amiltzean gertatu da istripua, El Bocal hondartzarik gertu. Horren ondorioz, gazteak itsasora erori dira. Inguruan zegoen txirrindulari baten deiari esker erreskatatu ahal izan dute gaztea larrialdi zerbitzuek. Arroka bati eutsita zegoen, hipotermiarekin, baina gainerako gazteek ezin izan zioten itsasoaren indarrari eutsi. Hogei urte inguruko zazpi gazteak —sei neska eta mutil bat— La Granja de Heras lanbide heziketako zentroko ikasleak ziren.