Mañuetako udal eraikin baten gainean Gerra Zibilean kolpisten alde borrokatu ziren zenbait lagun omentzeko jarrita dagoen plakaren kontra pintura gorria bota du ezezagun talde batek; horrez gain, eraikinaren aurrean Faxismoa borrokatu leloa idatzi dute.
Joan den martxoan Arabako Errioxako PSE-EEk salatu zuen Caídos por Dios y por España dioen idazkun horrek Memoria Demokratikoaren Legea urratzen duela, eta udalari horren berri eman zion. Modu berean, Gobernuaren Euskal Autonomia Erkidegoko Ordezkaritzari ere jakinarazi zioten frankismoa goratzen duen idazkia hor zegoela.
Herrian agintean den PPko alkateak behin baino gehiagotan uko egin dio idazkun hori kentzeari, eta "inori enbarazu egiten ez diola" ere esan du. Orain arte Espainiako Gobernuak hiru aldiz eskatu dio alkateari legea urratzen duen plaka kentzeko.
