Ataxia telangiektasia neuroendekapenezko gaitz arraroa ezagutarazteko 170 kilometroko ibilbidea egingo dute azaroan Oiongo bi korrikalarik. Izan eta Jon Ander izeneko kirolariek "gaixotasunaren inguruko kontzientzia sortzea eta ikerketarako zein kaltetutako familientzako laguntza biltzea" izango dute helburu, Corriendo Por una Causa ekimenak ohar batean ezagutzera eman duenez.
Erronka azaroaren 14tik 15era egingo da, eta Ardoaren eta Arrainaren Bidean 170 kilometro horiek egingo dituzte jarraian, EAEko eta Errioxako "paisaia ikusgarrietan barrena". Zabaldutako maparen arabera, Logroño eta Gasteiz arteko bidea egingo dute.
24 orduko gehienezko epean, eta atseden luzeak egin gabe, korrikalariak txandaka arituko dira, AEFAT elkartearekin elkarlanean, gaixotasunaren aurkako ikerketa finantzatzen eta kaltetutako familiei laguntza eskaintzen diharduen erakundearekin. "Gaixotasun honen garrantziaz ohartarazi nahi dugu, eta ikerketarako zein familientzako laguntza bildu nahi dugu", adierazi dute.
Ataxia Telangiektasia gaixotasun genetiko eta progresiboa da, nerbio sistema kaltetzen duena eta koordinazio, oreka eta mugimendu arazo larriak eragiten dituena. Gaixotasun honek pairatzen dutenek minbizia eta arnas arazoak izateko arrisku handiagoa dute.