Hondakin urak arazteko estazio berria martxan da Moreda Araban, eta estazioari lotutako ur biltzaile berriak ere indarrean daude jada. Ibaira isuritako uren kalitatea hobetzea ere ahalbidetuko du instalazio berriak.
Europar Batasuneko Next Generation funtsek finantzatuta, urte eta erdi behar izan da araztegi berria eraikitzeko, eta 2,5 milioi euro publiko inbertitu dira bertan. Mikel Jauregi Industria, Trantsizio Energetiko eta Jasangarritasun sailburuaren esanetan, Moreda Arabako araztegi eta biltzaile berriekin ekidin ahal izango da "gure ibaietan hondakin urak botatzea". Azaldu duenez, Arabako Errioxa da EAEn erronka hori egiteke duten eskualdeetako bat, eta horregatik du garrantzia berezia araztegia martxan jartzeak.
Jauregiren hitzetan, hondakin urak arazteko estazio berriak uraren kudeaketa "profesional eta jasangarriagoa" ekarriko du, bai etxebizitzen eta jarduera ekonomikoen urena. Gainera, etorkizunean etor litezkeen jarduera berriak hartzeko gaitasuna ere badu araztegiak, 4.000 biztanlerentzako baitago pentsatua.
Saneamendu sarea ere osatu da araztegiarekin batera, eta hala, banandu ahal izango dira hondakin urak eta euri urak. Aurrerantzean, euri urak soilik isuriko dira Horcajo errekara, eta hondakin urak araztegi berrira bideratuko dira.