Oiongo Udala Mugikortasuneko eta Garraioetako Foru Sailarekin bildu eta gero, Oion-Gasteiz autobus linea ezartzea erabaki du azken honek. Abuztuaren 1etik aurrera, goizean 8:44an Gasteizera ailegatzeko eta 15:00etan Oionera itzultzeko linea ezarri du Alavabusek. Linea bere horretan mantenduko da udan zein neguan, astelehenetik ostiralera, ordutegi berberarekin.
Oiondarrek haien udalari gehien egin dioten eskaera izan da, eta ondorioz udalak Arabako hiriburuarekin konektatuta egoteko autobus linea ezartzea eskatu dio Foru Aldundiari. "Eskaera hori egin digute herritar askok, duela urtebete Oiongo gobernuan sartu ginenetik", aipatu du Jose Manuel Villanueva Oiongo alkateak.