Eltziegon 86 etxebizitzako "bizitegi programa ahalbidetzeko" plan partziala onartu du Lurralde Oreka eta Lurralde Antolamendu Sailak, diputazioak ohar batean iragarri duenez.
Herriaren hego-ekialdean eraiki asmo dituzte etxebizitzak, San Roke inguruan, Marques de Riscal upategiaren eta Lapuebla de Labarcara doan errepidetik gertu. Bi motatakoak izango dira: 77 etxebizitza anitzeko blokean izango dira, eta beste bederatzi familiabakarrean. Orotara, eremuak 36.664 metro koadroko azalera hartuko du.
Hiru solairuko sei bloke eremuaren lur kota baxuenean jarriko dituzte. Familia bakarrekoak, eremu altuenean. Horrek "inpaktua minimizatuko" duela argudiatu du aldundiak. 4.479 metro koadroko eremu berde bat paratuko dute ere. Foru erakundearen arabera, onartutako planaren helburua da Arabako Errioxan "etxebizitza eskaria partzialki" asetzea.