Arabako PPk Guardiako Gizarte Segurantzaren bulegoa itxi dutela salatu du, eta, ondorioz, Arabako Errioxako bizilagunek Gasteizko bulegora joan beharko dutela edozein izapide egin ahal izateko.
"Gasteizko Gizarte Segurantzako bulegoa gainezka dago, edozein kudeaketa egiteko hitzordua eskatu behar da, webgunea eta telefonoa kolapsatuta daude eta hitzorduak atzeratu egiten dira", azpimarratu du Ana Salazar Arabako PP idazkari nagusiak. "Kudeaketak egiteko denbora arazoak bazeuden, Arabako Errioxako bulego bakarra itxita, horrek okerrera egingo du, izapide horiek ere zentralizatu beharko direlako".
Salazarrek salatu duenez, Guardiako bulegoaren itxierak honako hauei eragingo die: langileei Gizarte Segurantzan alta eman, dokumentazioa entregatu, Europako osasun-txartela eskatu edo erretiroa izapidetu behar dutenei eragingo die.
Duela urtebete, Aiarako PPk Amurrioko Gizarte Segurantzaren bulegoaren itxiera salatu zuen. Aiaraldeko bizilagun guztiek Laudioko bulegora joan behar dute. "Beste behin ere landa eremua zigortzen da zerbitzuen murrizketagatik. Lotsagarria da. Herriek behar eta eskatzen ditugun oinarrizko zerbitzu guztiak jarri beharrean, ditugunak kentzen dizkigute ".
Lekualdaketa
Gizarte Segurantzatik azaldu dutenez, aldiz, lekualdaketa eskatu du Guardian zegoen langileak, eta behin-behinean izango da itxita zerbitzua beste langile batek bete arte.