Larunbatean jokatuko da Arabako Binakako Bertsolari Txapelketako azken final laurdena, Oiongo zineman, 17:30ean. Orduan argituko da zein beste lau bikote pasako diren, Unai Anda-Iñaki Viñaspre eta Martin Abarrategi-Manex Agirrerekin, maiatzean jokatuko diren finalerdietara.
Kantuan ondoren bertsolariak arituko dira: Ander Aranburu Amenabarrok eta Rikardo Gonzalez de Durana Alzolak, Irati Anda Villanuevak eta Aroa Arrizubieta Barredok zein Manuel Bendala Garcia-Donasek eta Oihane Perea Perez de Mendiolak osatutako bikoteak igoko dira agertokira. Gai emailea Arantxa Sobrino Lasa izango da.
Hauen artean azpimarragarria da 2019ko banakako edizioko bi finalista daudela: hain justu ere, Aroa Arrizubieta eta Oihane Perea. Ander Aranburuk 2020ko Kuadrilla artekoan kantatu zuen lehen aldiz, baina inoiz ez da banakako txapelketan aritu.
Ateak 17:00etan irekiko dira eta sarrerak www.bertsosarrerak.eus webgunean daude salgai. Aforoa bete artean bertan ere sarrera erosteko aukera egon daiteke. Bazkideek 4 euro ordaindu behar dituzte eta sarrera arruntak 6 euroko kostua du. 16 urtetik beherakoentzat dohainik izango da.