Oiongo Udalak minutu bateko isilunea egin du asteazken honetan, Logroñon hil duten Isam Haddour 34 urteko herritarraren heriotza gaitzesteko eta dolu-seinale moduan. Halaber, Udalak adierazpena onartu du "ekintza krudel eta anker hau" arbuiatzeko; gertaerak argitzea eta errudunak ordaintzea eskatu du, eta Issamen familiarentzat justizia egitea.
Halaber, dozenaka herritarrek elkarretaratzea egin zuten Plaza Nagusian, arratsaldeko zortzietan. Udalbatza kalera atera zen ere. Txalo zaparrada batekin amaitu zuten kontzentrazioa, eta, familiaren izenean, bozeramaile batek herritaren babesa eskertu zuen: "une latz hauetan Udalaren eta gure herriko herritarren babesa sentitu dugu".
Bestalde, familia eta lagunei eta Oiongo islamiar komunitate osoari babesa eta elkartasuna erakusteko, larunbat honetan beste kontzentrazio bat deitu dute, 13:00etan, Oiongo Plaza Nagusian.
