Eusko Jaurlaritzako Segurtasun Sailak adierazi duenez, 53 eta 56 urteko bi langile hil dira Lapuebla de Labarcako Espada Ojeda upategian, mahats biltegi batera erorita. Horietako bat Lapuebla de Labarcako alkate ohia da, Daniel Espada; eta bere senide bat ere hil da istripuaren ondorioz.
Lan-istripua 19:40ean gertatu da, bi langile upategiko instalazioetan lanean ari zirela. Hainbat iturriren arabera, horietako bat biltegi batera erori da, eta hori laguntzen saiatu den behargina ere barrura erori da. Biak hil dira ezbeharrean, dirudienez tufoaren -mahatsen fermentazioek eragindako gas karbonikoa- ondorioz.
Errioxako Osasun Zerbitzuko langileak bertaratu dira, baina ezin izan dute ezer egin bi langileak salbatzeko.
Gorpuak Gasteizko Auzitegiko Institutu Anatomikora eramango dituzte, autopsia egiteko. Errioxako Larrialdietako Berehalako Erantzun Talde (ERIE) psikosoziala upategira joan da, baita Lan Ikuskaritzako talde bat eta Ertzaintza ere. Gertakariak ikertzen ari dira orain.
"Lur jota gaude. Covid-19arekin kezkatuta, eta tufoa dator gure bizitza izorratzera", adierazi du ABRAko zuzendari Ines Baigorrik.
Lan-istripua eta bi hildako Lapuebla de Labarkako upategi batean. pic.twitter.com/jyjgPZdCRz
— Arabako Foru Suhiltzaileak (@BomberosAraba) October 7, 2020