Asteazkenean, zerbitzu publiko horiek bere gain hartzea eskatu zion EH Bilduk Udalari. Udalbatzak onartutako mozioaren arabera, munizipalizazioak langileen lan baldintzak hobetuko ditu, besteak beste: "Enplegu duina sortuko luke, kudeaketaren eraginkortasuna hobetuko litzateke, eta etekin ekonomikoak ekarriko lituzke udal ogasunean".
EH Bilduko bozeramaile Jose Manuel Villanuevak gogorarazi du udalerriak Euskal Herriko "langabezia-tasarik altuenetakoa" duela, eta, ondorioz, Udal Gobernuaren "lehentasuna" izan behar dela "langabeziaren aurka eta kalitatezko enplegua sortzearen alde" aritzea.
Gaur egun, garbiketa zein lorategien mantentze zerbitzuak azpikontratuta ditu Oiongo Udalak. Garbiketa lanengatik 130.000 euro ordaintzen ditu urtean, eta lorategien mantentze-lanengatik beste 120.000.
EH Bilduren eta EAJren botoei esker, udalbatzak onartu du balizko munizipalizazioaren azterketa ekonomikoa eta soziala zerbitzu publikoen hurrengo esleipena baino lehenago egitea. Azterketak ondorio ekonomikoak eta gaur egun dauden langileen artean izango dituen ondorioak jasoko ditu.
Villanuevaren ustez, "erakunde publikoek eskaini beharreko zerbitzuen pribatizazioarekin amaitzeko aurrerapauso inportantea da".