Errioxako Kontseiluak kudeatzen duen Arabako Errioxa marka berreskuratzeko eskatu du EH Bilduk

Arabako Errioxa marka Errioxako Kontseiluaren esku dago. PHOT.OK

Arabako ardoa eta elikagaiak ez ezik bestelako produktuak ere merkaturatzeko baimena eskuratu du Errioxako Kontseiluak; Diputazioak eta Jaurlaritzak ez dutela ezer egin salatu du EH Bilduk.

"Azken hamarkadetan instituzioek beste aldera begiratu dute eskualde bati bere izena lapurtzen zioten bitartean". Irmo salatu du EH Bilduko bozeramaile Kide Fernandez de Pinedok Eusko Jaurlaritzak eta Arabako Diputazioak Arabako Errioxa marka galdu izana. Talde politikoaren esanetan, Errioxako Kontseilu Erregulatzaileak Arabako Errioxa marka erroldatu du, Europan ardogintza eta elikagaiei lotutako produktuak merkaturatu ahal izateko: "Soilik Arabako Errioxako Kuadrillak helegite bat aurkeztu zuen eskaera horren aurrean. Arabako Foru Aldundiak eta Eusko Jaurlaritzak, aldiz, ez dute inolako mugimendurik egin Arabako eskualde horren izena defendatzeko".

Gauzak horrela, EH Bilduk ekimenak aurkeztu ditu Batzar Nagusietan zein Eusko Legebiltzarrean, Arabako Errioxako marka berreskuratzeko. Fernandez de Pinedo batzarkideak eta Eva Lopez de Arroyabe legebiltzarkideak nabarmendu dutenez, administrazioen "utzikeria" dago gertatutakoaren atzean; eta "Arabako Errioxako ardogintzan ez dutela ibilbide orri bat adierazten du".

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide