Arabako Errioxako ardoak Lujanbio izango du pregoilari

Maialen Lujanbio Festaren kartelarekin. ALEA

Elvillarren egingo dute Arabako Errioxako Mahats Bilketa festa, igandean, eta Maialen Lujanbio izango da pregoilaria.

Elvillar herrian egun osoko egitaraua prest dute, igande honetan mahats bilketari hasiera emateko. Ekitaldi ofiziala 11:30ean izango da, Maialen Lujanbio bertsolari hernaniarraren pregoiarekin. Gerardo Olano alkateak azpimarratu duenez, Lujanbiok erabat betetzen du Udalak pregoilaria aukeratzeko jarri zuen helburua: "Emakumea genuen buruan, eta gainera, Maialen, euskal kulturan erreferente da". Pozik azal­du da Lujanbio ere izendapenarekin, "nirekin gogoratu di­relako", eta baita ere, "ho­rrela, Arabako Errioxan eus­ka­raren alde lan egiten dutenei babesa" emateko aukera due­lako.

Horrela, bertsolari txapeldunak Karra Ele­jalde aktore gasteiz­tarraren lekukoa hartuko du, bera izan baitzen pregoilari lehengo urtean, Ekoran. Arabako Errioxako Kuadrillako herrietan txan­daka egiten den ospakizuna da Mahats Bilketa Festa, eta urtero lez, egun osoko egitaraua prest daukate.

Pregoiaren aurretik, 11:00e­tan, Ardoaren Dantza egin­go dute Arabako Errioxako dan­tza taldeek. Horren on­doren, 11:30e­an egingo da eki­taldi ofiziala, eta bertan ariko da pregoilari lanetan, Maialen Lujanbio. Bertan zapalduko da mahatsa, eta aurreneko muz­tioa dastatu ahal izango da. Arabako Errioxako ardoak das­tatzeko aukera ere izango da segidan; 7 euroren truke, kris­talezko kopa jaso eta bost ardo probatzeko aukera izango da.

Dastaketarako gida nahi duenak, berriz, 12:30ean izan­go du tartea. Ordu berean, bestalde, Aizkolarien Mahats-biltze Txa­­pelketa egingo da, eta goiza borobiltzeko, herri baz­karia izango da 14:30ean. Arratsaldean, pilota partiduak izango dira. Bestalde, egun osoan zehar nahi duenak Sorginen Txa­bola trikuharria bisitatu ahal izango du. Era berean, ume­en­tza­ko jolas eta ekintzak, musika, eta artisauen eta la­bel­dun nekazaritza produk­tu­en azoka izango dira.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide