Hilaren azken larunbata aukeratu dute Arabako Errioxako gazteek eskualdea astinduko duen mugimendua abiatzeko. Lurrikara izenpean, hilaren 28an jarduerez betetako eguna prestatu dute, Oionen.
Otsailetik, hamar bat elkarte lanean ari dira ekimenari itxura ematen. Gazte eta kultur elkarte horiek eskualdean nabaritu duten komunikazio faltari aterabidea eman nahi izan diote. "Urtean zehar ekimen desberdinak egiten dira, baina eskualde mailako elkarlan hori bultzatzeko eta guztiei aurkezteko egun bat antolatzea bururatu zitzaigun", azaldu du Lurrikara-ren antolaketa lanetan dabilen Lore Terroba gazteak. "Bidali nahi dugun mezua da Arabako Errioxa nahiko geldirik dagoela, baina egoera hori irauli eta eskualdea astintzera goazela erakutsi nahi dugu".
Bideoa eta abestia
Esan eta egin, buru-belarri jarri dira horretan, auzolana oinarri. Etorkizunean ekimenera jende gehiago batuko dela espero dute antolatzaileek. Lehen hitzordua Oionen egingo dute, baina urte bakoitzean herri desberdin batean egitea da gazteen asmoa.
"Behin egun hori pasatuta, balorazio bat egingo dugu, beharren arabera ekimen berriak antolatzeko", gaineratu du Terrobak.
Oionera joateko, Kuadrillako herri guztietatik autobusak antolatu dituzte. Irteera goizeko bederatzietan izango da, eta buelta, berriz, hurrengo eguneko goizeko seietan. Autobusak erabiltzeko, urriaren 25a baino lehen eman behar da izena; antolatzaileek Facebook sarean sortu duten orrialdean daude xehetasunak.
Ekimena sustatzeko, bideo eta abesti bana prestatu dute. Eh Mertxe! rock taldea arduratu da musikaz, eta bideoa Villabuenan grabatu dute. Abestian argi ageri da hartu duten konpromisoa: "Ikara mahai azpian ez da bakarra, erreplika egongo da".