Enplegu anezka izango du ostera ere Arabako Errioxak; bada, Guardian izan beharrean, aurten, Oionen eskainiko dute programa hori. "Guardian 2016an funtzionatu zuen taldea Oionera eramango dugu, langabezia gehien dagoen Arabako herria baita, %22 baino langabezia tasa altuagoa baitu", azpimarratu du asteon egindako aurkezpenean Arabako Diputazioko Enplegu, Merkataritza eta Turismo Sustapenaren saileko diputatu Cristina Gonzalezek.
Denera, lau anezka jarriko dituzte udazkenean martxan herrialde osoan; pasa den urtean baino bat gehiago. Horietako bi, Gasteizen egongo dira; eta, bana, Laudion eta Oionen.
20 lagunentzako tokia
Lana aurkitzeko aukera hobetze aldera, langabetuei baliabide eraginkorrak eskainiko zaizkie bertan. Oiongo anezkan, 18 eta 59 urte bitarteko 20 lagunentzako tokia izango dute. Edozein formazio maila duten eta edozein lanbidetik datozen langabetuak onartuko dituzte; hori bai, Lanbiden izena emanda izan beharko dute. Aukeratutako lagunek hainbat bilera izango dituzte astean; teknikari baten laguntza izango dute horietan. Lana samurrago topatzeko askotariko formazio saioak jasoko dituzte.
Programan parte hartzeko interesa dutenak urriaren 11a baino lehen apuntatu behar dira Interneten, Oiongo udaletxean edo Lanbiden. Informazio gehiago nahi dutenek 945- 62 21 90 telefono zenbakira ere dei dezakete.