"Ardogileek soberan zegoen mahats aihenekin zerbait egin nahi zuten"

"Ardogileek soberan zegoen mahats aihenekin zerbait egin nahi zuten"
Borja Monje HAZIko teknikaria, Arkautin. / Juanma Gallego

Aihenak biomasa bihurtzeko apostuak eskaintzen dituen aukerez eta arazoez mintzo da HAZIko teknikaria. 

 

Nola bururatu zaizue aihenak erregai bihurtzen saiatzea?

Arabako Errioxako ardogileek aspalditik zeukaten aihenaren inguruan zerbait egiteko gogoa, orain arte txuletak erretzeko edo, zenbaitetan, ongarri gisa baino ez baita erabili. HAZIn biomasaren gaia jorratzen dugunez, egoera aztertzeari ekin genion; 13.000 hektarea mahasti daude Arabako Errioxan, eta hektarea bakoitzeko tona eta erdi aihen ateratzen dira urtero: 18.000 tona, hain zuzen.

Antzeko beste esperientziarik ba al dago munduan?

Batzuk badira. Guk gertutik jarraitu dugu Katalunian egin duten saiakera, kasu honetan, aihen ezpalak erabili dituzte, pellet bihurtu gabe. Hiru udal eraikin berotzen ari dira horren bidez. Baina ezpalak arazo txikiak ematen dituzte, homogeneoak ez direlako eta batzuetan trabatzen direlako. Horregatik pellet-en aldeko apustua egin dugu Araban.

Oraingoan eskuz jaso dituzue aihenak...

Bai. Ondo bereizi eta aztertu nahi ditugu mota guztietako mahastiak: zaharrak, gazteak, ardo zuria, beltza... bakoitzak zenbat bero sortzen duen ondo zehazteko, besteak beste. Horretarako, aurten eskuz jaso ditugu, baina horrek produktua garestitzen du. Hurrengo urtean ikertu nahi dugu zer nolako makinak erabili daitezkeen aihenak soroetan bertan txikitzeko. Errentagarritasuna lortzeko beharrezkoa da hau.

Orain, zertarako erabiltzen dira aihenak?

Batez ere ongarri gisa erabiltzen dira, baina ez da komenigarria lurrean urtez urte erabiltzea. Izan ere, mahatsondoetan produktu fitosanitario asko erabili ohi dira, eta mahastiek ere gaixotasun txikiren bat izan dezakete.

 

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?

Izan zaitez ALEAkide