Villabuenako Montecillo trikuharria berrituko dute

Mirian Biteri 2016ko mar. 5a, 08:00
2010ean, ikerlanak egiten. EHU

Arabako Diputazioak Villabuenako Montecillo trikuharria eraberrituko du aurten. Horixe baieztatu du udalerriko alkate Iñaki Perez Berruecok. Jakinarazi du orain dela hilabete inguru hitz egin zuela Foru Aldundiko teknikariekin, eta urtea amaitu baino lehen "guztiz berrituko" dutela iragarri zioten.   

Montecillo trikuharria Villabuenako herritar batek aurkitu zuen 2009ko amaieran; Villabuena herritik iparraldera begiratuta, kilometro erdira dago kokatuta. Topatu bezain pronto, Euskal Herriko Unibertsitateko Historiaurreko Sailekoak hasi ziren aurkikuntza horren azterlanekin.

Hilobia bi mahastiren artean dago; desitxuratuta dago eta aurkitu zutenean harri mordoxka batez erdi estalita zegoen. Korridorerako sarrera bi lursail banatzen dituen harresi batek estaltzen zuen orduan.
Arabako Errioxan dauden beste zazpiren ezaugarri antzekoak ditu. Poligono itxura duen kamera batek osatzen du trikuharria; aipatutako azken hori bost blokez eta bi bloke dituen korridore batez osatua.

Zabalerari dagokionez, 2,10 eta 2,35 metrokoa da, iparraldetik hegoaldera eta ekialdetik mendebaldera.
Aurkikuntza Arabako Errioxan horren ohikoa den hondar-geruza baten gainean dago. Kameraren barrualdean kraterra sortu zen, litekeena, hilobi-kameraren edukiera handitzeko.

Brontze Arokoa

Indusketa-lanetan hainbat pieza garrantzitsu aurkitu eta berreskuratu ziren; tartean, giza hezurrak: tartsokoak, hortz piezak eta gazte baten orno zerbikala.
Horien lagina Miamiko (AEB) laborategi batera bidali zuten; bertan zehaztu zen Villabuenako dolmena Brontze Aroko hasierakoa dela.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide