Arabako PSE-EEk erabaki du Mar Daban, gaur egun Espainiako Gobernuak Araban duen ordezkariordea, Arabako Foru Aldundiko Enplegu, Merkataritza, Turismo eta Foru Administrazioko diputatu berri izendatzea, Cristina Gonzalezen lekukoa hartuta. Sozialistek Javier Hurtado Kongresurako hautagai izendatu ostean eta Gonzalez Jaurlaritzako Turismo, Merkataritza eta Kontsumo sailburu izango dela iragarri ondoren helduko da erreleboa.
PSE-EEren arabera, Dabanek ibilbide profesional eta instituzional sendoa du. Zuzenbidean eta Enpresen Administrazio eta Zuzendaritzan lizentziaduna da, eta lan arloko eskarmentu zabala metatu du Lan eta Gizarte Segurantzako ikuskatzaile gisa. Alderdiaren esanetan, kargu horretan enpresen errealitatea, lan baldintzak eta enpleguaren kalitateari lotutako erronkak "gertutik ezagutu" ditu.