Artium museoak eta EHUk Genealogia feministak artxiboetan: ikerketa, memoria eta kanonaren berridazketa izeneko mintegia antolatu dute. Ekainaren 25ean eta 26an izango den topaketa honen helburu nagusia museo, unibertsitate eta dokumentazio zentroen arteko elkarrizketa artikulatzea da. Hala, feminismoari eta praktika artistiko garaikideei lotutako artxiboen inguruko hausnarketa kritikorako eta elkarlan profesionalerako gune bat eskainiko da.
Elena Roseras Carcedo Artiumeko dokumentazio arduradunak zuzenduko du ikastaroa. Egitarauan zehar, funtsezko hainbat gai jorratuko dira; besteak beste, emakume artisten artxiboen sorrera, kontserbazioa eta aktibazioa, ikuspegi feministatik egindako ikerketa eta ezagutzaren ekoizpena, eta metodologia feministak dokumentazio politiketan nola txertatu. Horrez gain, egungo erronkei ere helduko zaie, hala nola genero-joerei eta alborapenei sistema algoritmikoetan eta adimen artifizialean.
Bi egunez luzatuko den mintegiak erreferentziako espezialistak eta erakunde ezberdinetako profesionalak bilduko ditu, hamar txosten eta talde eztabaidako bi saio egiteko. Hizlarien artean izango dira, adibidez, Eresbil musikaren euskal artxibokoak, Gizarte Ikasketa Aurreratuen Institutukoak (CSIC), IPES Fundaziokoak, edota Zaragoza, Salamanca, Granada eta Madrilgo Unibertsitate Autonomoko adituak, baita ikertzaile eta komisario independenteak ere.
Ikastaroa modalitate bikoitzean jarraitu ahal izango da, bai aurrez aurreko formatuan, bai online zuzenean, eta interesa duten guztiek eman dezakete izena.