Zaballako espetxean dauden presoek salatu dute bertako zuzendaritzak haizagailuak erostea debekatu diela esanez Euskal Herrian ez duela hainbesteko berorik egiten. Aitzitik presoek azpimarratu dutenez, aurreko asteko bero bolada betean gauerdian 29 gradu arteko tenperatura izan zen Zaballako ziegetan.
"Espetxean, eguneko eta gaueko ordu asko ziegetan itxita ematen ditugu. Ziegetan ez dago haize korronterik eta egunean zehar egin duen beroa espetxeko hormen zementuan mantentzen da", azaldu dute. Gogoratu dutenez, beste espetxeetan haizagailuak eros daiteke inolako arazorik gabe.
Gaixoak eta adinekoak
Egoera ez da berria. Iaz ere antzeko bero boladak izan zirenean presoek espetxeko zuzendaritzari eskatu zioten haizagailuak kanpoan erosteko aukera emateko, "eta ezezko borobila jaso genuen". Aurten, eskaera berdina egin dute, eta pertsona askoren osasun egoera eta adineko pertsona asko dagoela kontuan izateko eskatu diote Zaballako zuzendaritzari. Ezezkoa jaso dute beste behin.
"Sinesgaitza bada ere, 2026.urtean eta Gasteiz hiriburutik kilometro gutxi batzuetara, haizagailu bat erostea debekatuta dago. Noiz eta kalean egoera honen aurrean beharrezkoa den toki guztietan ezohizko neurri eta plangintzak garatzen ari direnean, gu presoak baztertuta utzita", salatu dute.
Gaineratu dutenez, presoentzat haizagailuak debekatzen dituzten bitartean, "espetxeko funtzionarioei haize egokitua jartzen diete".