+55 Elkartegien programarako jarduera proposamenak aurkezteko epea ireki du gaur aldundiak. Foru erakundeak Ignacio Aldekoa Kultur Etxearen bidez kudeatzen duen programarako deialdia pertsona partikularrei, profesional autonomoei, enpresei eta elkarteei zabalduta dago. Aurten deialdiak irizpide sozialak txertatuko ditu proposamenen ebaluazio prozesuan, kalitate teknikoarekin batera. Maiatzaren 6tik 20ra bitartean aurkeztu ahal izango dira. Besteak beste, esperientzia, genero ikuspegia, euskara, tolerantzia, gizarte inklusioa eta kultura aniztasuna sustatzea baloratuko dituzte.
"Helburua da programaren jarduera poltsa zabaltzen jarraitzea, 2024 eta 2025eko deialdietan bildutako eskaintzari proposamen berriak gehituz", azaldu du aldundiak, ohar batean.
55 urtetik gorako pertsonei zuzendutako jarduera soziokulturalen programak "zahartze aktiboa eta parte hartze kulturala sustatzeko" helburua du. Programak hiru kategoria ditu: Gasteizen egiten diren ikastaroak, lurralde osoan egiten diren tailerrak eta hainbat formatu eta iraupenetara egokitako hitzaldiak.