Ekainaren 14an ospatuko da aurten Araba Euskaraz, eta giroa berotzeko hainbat ekitaldi antolatzen dabiltza. Gaur goizean, Amurrioko Juan Urrutia parkeko GUK eskulturaren aurrean, Aresketa Ikastolak 2026ko Araba Euskaraz ekimenerako sortutako abestia aurkeztu du: Taupadak berpiztu!
Ekitaldian izan dira Aresketa Ikastolako ordezkariak eta kantuaren egileak, Igon Olaguenaga eta Txiki Lora. Ikastolako ikasleek, berriz, abestiarako propio sortutako koreografia dantzatu dute, euskararen eta euskal kulturaren egoeraren aurrean taupadak berpizteko beharra aldarrikatuz.
Abestiaren letrak euskararen biziberritzearen premia nabarmendu du, herriaren bihotz taupadak berpizteko deia eginez. Testuak 1960‑1970eko berpizkundetik gaur egungo geldialdi zantzuei arteko ibilbidea gogora ekartzen du, eta euskara "heriotzatik normalizaziotik baino gertuago" dagoela ohartarazten du, "gogoa eta kuraia" aktibatzeko premia azpimarratuz.
Antolatzaileek azaldu dutenez, kantuak aniztasuna eta dantzagarritasuna ditu oinarri: soinu organikoz sortutako salsa doinu baten gainean, alboka, trikia, tronpeta, tronboia eta perkusio latinoaren nahasketa koloretsua entzun daiteke.
Sorkuntzaren atzean Igon Olaguenaga (ikasle ohia eta egungo langilea) eta Txiki Lora (ikastolako aita) daude, eta hainbat musikari ezagunek ere hartu dute parte: Amaia Santamaria , Rodrigo Ulises, Yago Salorio, Marcos Ortega, Fernando Blanca, Ibon Koteron, Joseba Tapia eta Iñaki Otxondorena “Moro”. Aresketa Ikastolako ikasleen ahotsak ere jaso ditu grabazioak, eta Elkar Estudioko Victor Sanchez aritu da nahasketa eta masterretan.
Taupadak berpiztu! abestiaren letra:
Nondik gatoz ta
nora goazen, alajaina!
ez dezagun ahaztu
zein den gure bidaia
batu ditzagun denok
gogoa ta kuraia
mingainean daukagu
behar den sendagaia
hemen daukagu berriz
berpizteko garaia
mezu zuzena dakar
aurtengo elaiak
Bazen behin
herri txiki baten algara
izenez Euskal Herria
hizkuntza euskara
Zabala dela esan nahi diot
Arabaraino hurbildu denari
erantzukizuna Amurriok
taupadak emateko festari
Geldituko gaituenikan ez da
irakaskuntzan jarraitzen bada
euskaraz behar dugulako urezta
eusko, eusko eskualdunak gara
Ez dugu inor utzi behar atzera
bakarrik ez gara, gara batera
hurbildu zaitez euskararen sura
Euskal Herritik munduraaaaa!
Araba aske eta euskaldun
ikastolaren oihua entzun
hemen gaituzu
maitale eta lagun.