Araba, Bizkaia eta Gipuzkoako foru aldundiek adostu dute tasa turistikoa 2027ko urtarrilaren 1ean indarrean jartzea. Hiru lurraldeetan modu bateratuan aplikatuko da, turismoaren eraginari aurre egiteko eta tokiko zerbitzu publikoak finantzatzen laguntzeko.
Tasa 0,5 eta 7,5 euro artekoa izango da pertsona eta gau bakoitzeko, ostatu motaren eta kategoriaren arabera. Landetxeek tarte apalagoa izango dute: 0,5 eta 1,25 euro. Gehienez bost gau kobratuko dira, eta 2026ko otsailaren 5a baino lehen egindako erreserbek ez dute zergarik ordainduko.
Udalek oinarrizko tarifak ezarriko dituzte (0,5–5 euro), eta 750 loleku baino gehiago dituzten udalerriek errekarguak aplikatu ahal izango dituzte, gehienez %50 arte, kopurua 7,5 eurora igota. 25 plaza edo gutxiagoko udalerriek ez dute zertan tasa aplikatu.
Foru arauaren proiektua oraindik Batzar Nagusietan onartu beharko da. Araban, martxoaren amaieran egitea aurreikusten da, eta EAJ-PSEren Gobernuak oposizioko alderdiren baten babesa beharko du araua aurrera ateratzeko.
Tasa aplikatuko zaie hotel, pentsio, apartamentu turistiko, kanpin, landetxe, aterpetxe eta erabilera turistikoko gelei, baita gurutzaontzi turistikoetako bidaiariei ere. Ostatuek kobratuko dute eta dagokien udalari jakinarazi beharko diote egonaldiaren berri.