Hauts ganduarekin batera, laino eta lanbroak izango ditugu goizean goiz. Ondoren, zerua hodei gutxirekin geratuko da, baina hodei tarte batzuk ere etorriko dira bisitan. Eolo hego-ekialdetik arituko da, ahul-bizi, eta bolada gogorrekin. Batez ere egunaren erdiko orduetan zakartuko da. Tenperaturak 5 eta 16 gradu artean ibiliko dira Gasteizen.
Antzera esnatuko da osteguna: goiz lanbroekin, eta egunean zehar hauts gandua mantentzeko aukerekin. Bezperan baino hodei gehiago izango ditugu zeruan, baina erdi eta goi mailakoak izango dira horiek. Arratsalde eta gau parterako, ordea, hodeitza dezente trinkotuko da, euria botatzeko aukerarekin. Halere, tenperaturek gora egingo dute, 7 eta 18 gradu artekoan geratuz.