Hainbat nobedade dakartza hirugarrenez ospatuko den Aldekoa ipuin literarioen nazioarteko jaialdiak. Lehenengo aldiz, Gasteiz eta Laudio lotuko ditu, eta, besteak beste, Uruguai eta Argentinako autoreek parte hartuko dute kontakizun laburren inguruko saioetan. Martxoaren 10etik 14ra, askotariko proposamenak eskainiko ditu: literatura elkarrizketak, mahai inguruak, irakurketak eta ipuinen inguruko tailerra.
Ipar Euskal Herriko literaturak eta ipuingintzak, esate baterako, bere txokoa izango du EHUko Micaela Portilla ikergunean. Ur Apalategi, Itxaro Borda eta Xan Idiart idazleak arituko dira hizlari, Irati Majuelok gidatutako mahai inguruan.
Programazioaren gakoetako bat, halaber, hibridazio artistikoa izango da, literatura eta musika uztartuko dituen Uxue Alberdi eta Eñaut Elorrietaren kolaborazioari esker, edota Jose Ovejerok gidatuko duen zinema eta literaturari buruzko saioarekin.
Nazioarteko ahotsak
Aldekoa jaialdia inoiz baino "nazioartekoagoa" dela azaldu du Iban Zaldua ipuingintza jaialdiaren zuzendariak, besteak beste, Uruguaiko Fernanda Trias eta Argentinako Clara Obligado eta Valeria Correarekin, narratiba laburrari buruzko askotariko begiradekin. Manuel Rivas eta Juan Garzia bezalako egile erreferentzialak ere ez dira faltako aurten.
Gainera, 2025eko Aldekoa saria irabazi zuen Fernando Garrigaren Un bucle de tiempo lana aurkeztuko dute, eta 2025eko Aldekoa beka eskuratu zuen Ruben Sanchezek ere parte hartuko du programan.
Apustu "irmoa"
Itxuraz "xumea" den genero honek irakurlearen gogoan hazteko duen gaitasuna azpimarratu du Zalduak, merkatuaren zurrunbilo komertzialetik urrun, eta jaialdia bera ere xumetasun horretan bat datorrela gogoratu du: "Baita aurrera egiten jarraitzeko nahiarekin ere, eta, horretarako, egile ospetsuak erakartzen ditugu eta, aldi berean, ipuinaren tradizioa etengabe berritzen duten ahots berriak kontuan hartzen".
Jaialdiarekin egindako apustua sendoa dela nabarmendu du Ana del Val Kultura diputatuak: "Hiru edizio hauetan izandako hazkundeak erakusten du kontakizun laburrak eremu bizia eta garrantzitsua duela Araban, eta gure konpromisoak inoiz baino irmoagoa izaten jarraitzen du". Lehendabiziko aldiz, programazioa Laudiora zabalduko dute aurten, eta helburua hurrengo urteetan lurraldeko txoko gehiagotara hurbiltzea dela gogoratu du.