Otsailaren 28an banatuko ditu Espainiako Zinema Akademiak Goya sariak, Bartzelonan, eta, aurten ere, zinemagile arabarrek beren lekua izango dute jaialdian. Emakumezko aktore onenaren kategorian izango da ordezkaritza zabalena: Patricia Lopez Arnaiz eta Susana Abaitua izango dira lehian.
Alauda Ruiz de Azua zuzendariaren Los domingos lanak lortu du izendapen gehien, hamahiru, eta horien artean Patricia Lopez Arnaizena, aktore protagonisten artean. Susana Abaitua, berriz, Agustin Diaz Yanesen Un fantasma en la batalla pelikulan egindako lanagatik izendatu dute. Aktore arabarrekin batera, Angela Cervantes, Antonia Zegers eta Nora Navas ere aukeratu dituzte kategoria berean.
Los domingos pelikularen atzetik, Oliver Laxeren Sirat pelikulak hamaika izendapen lortu ditu; Jose Mari Goenaga eta Aitor Arregiren Maspalomas euskarazko pelikulak bederatzi; eta Manuel Gomez Pereiraren La Cena-k, ostean, zortzi.
Paul Urkijoren Gaua filmak, berriz, teknika arloko hiru izendapen jaso ditu; jantzi diseinua, makillaje eta ile apainketa, eta efektu berezien kategorian.