Adimen Artifiziala erabiliz ustez haur pornografia ekoitzi duen pertsona bat atxilotu du Araban Espainiako Polizia Nazionalak. Atxiloketa egiteko ikerketa "oso konplexua" izan dela esan dute, pertsona horrek bere arrastoa sarean ezabatzeko "teknika garatuak" erabili izan dituelako. Ez dute zehaztu non izan den atxiloketa.
Abuztuan hasi ziren lehen polizia ikerketak, nazioarteko kolaboraziorako kanalen bidez delitu horren berri izan zutenean. Azkenean, eta delitugileak anonimotasuna mantentzeko teknikak erabiltzen zituen arren, material pedofilo horren ekoizpena Araban zegoela aurkitu zuten.
Haren etxean sartu eta miaketa lanak egin ostean, atzemandako materialaren artean adimen artifizialaz egindako irudiak daude. Horietako batzuk egiteko, kalean eta udal igerilekuetan adingabeei ateratako argazkiak erabili ditu, adingabe horien irudiak AA bidez biluzten. Behin material hori aurkituta, poliziek pertsona hori atxilotu dute, haur pornografia ekoitzi eta edukitzeagatik adingabeak galbidean jartzea egotzita.