Euskal Herriko gazteen "topagune" izateko helburuarekin jaio da maiatzaren 15 eta 16an Gasteizen ospatuko duten Batbatean musika jaialdia. Lehendabiziko kartelean iragarri dutenez, besteak beste, Hofe, Jarfaiter, Segismundo Toxicomano, Skabidean, Xiberoots, Lukiek, Añube, Metrika eta Brigade Loco izango dira Mendizabalan.
Guztira, 21 talde eta bost DJ egongo dira, eta horiekin batera jaialdiaren esperientzia osatuko duten beste jarduera batzuk. "Gazteei bereziki zuzendutako jaialdia da, Arabako eta Euskal Herri osoko gazteak elkartzeko asmoz sortua. Estilo eta jatorri ezberdinetako artistak bildu dira, publiko zabal eta anitzarekin konektatzeko", azaldu dute antolatzaileek.
Bi eszenatoki nagusi izango dira, karpa bat musika eta programazio propioarekin, eta janari guneak ere bisitariek atseden hartzeko. Programazio osoa urtarrilean aurkeztuko dute. "Jaialdiaren programazioa estilo ezberdinetako taldeekin osatu da: rocka, punka, rapa, popa, elektonika eta bestelako eszenak uztartuz, gustu eta publiko guztientzako proposamenak biltzeko".
Lehendabiziko sarrerak abenduaren 16an jarriko dituzte salgai, jaialdiaren webgunean.