Asteazken hotz eta goibela izango dugu, zeru oso hodeitsuekin eta zaparradak botatzeko aukerarekin. Ez du elurrik egingo, mendietan ez bada, kota 1.200 metro inguruan kokatu baitute. Eolo indar askorekin ariko da —abisu horia dute kostaldean—, iparraldetik ufa eginez. Gasteizen -1 eta 10 gradu arteko alde termikoa espero dute.
Antzeko mihisea marraztuko du ostegunak, zeru oso hodeitsu edo estaliekin. Bereziki lehen orduetan euria bota ahalko du. Mendebaldeko haizeak bolada gogorrak botako ditu, eta elur kotak gora egingo du. 1.300 metroren bueltan kokatuz. Hotza izango bada ere, minimoak ez dira horren ankerrak izango, eguneko alde termikoa 4 eta 12 gradu artean kokatuko baita.