Trebiñuko zenbait herritako bizilagunek Lagrango eguneko arreta zentrora joateko aukera izango dute, Lagran eta Trebiñuko udalen artean sinatutako lankidetza hitzarmen bati esker. Hala, Lañu, Baxauri, Obekuri, Albaita eta Paritzako egoiliarrek Lagranen dauden hamabost plazetako batean artatu ahalko dituzte hemendik aurrera.
2014tik martxan dagoen zentroaren finantzazioaren %80 aldundiak hartzen du bere gain, eta beste %20 udalaren esku geratzen da. Bada, orain Trebiñurekin sinatutako hitzarmenaren ondorioz, bi udalerriek partekatuko dute dagozkien %20 hori, beti ere udalerri bakoitzean dagoen erabiltzaile kopuruaren arabera.
Lagrango Udalak ohar batean ezagutzera eman duenez, aldundiak arautuko du onarpen prozesuan, bi udalerrietako gizarte langileekiko koordinazioan. Urtzi Gaintzarain Lagrango alkatearen esanetan "ez du zentzurik" Trebiñun bizi diren herritarrei eguneko zentrorako sarrera galaraztea "banaketa administratibo anakroniko batean oinarrituta".