Gasteizko TAO eremuaren zabalpenak traba gehiago ekarri ditu Arabako herrietan bizi eta Gasteizen lan egiten duten herritarrentzat. "Bidegabekeria" hori dela eta sinadura bilketa hasi dute Change.org plataforman hainbat bizilagunek TAO bereizgarri bat ezartzeko eskatuz, "Gasteizko landa eremuetako baldintzen antzera".
Udaletik proposatutako alternatiba batzuk —hala nola 4 edo 8 orduz aparkatzeko aukera ordainduta— ez dituzte egokitzat jo, "egunero lantokira joateko kostua onartezina" delako.
Halaber, azpimarratu dute eremu berrietan bizilagunentzako eta erabiltzaileentzako aparkalekuak soberan daudela, plaza huts asko ikus daitezkeelako egunero. "Eremu horietan negozioa duten autonomoei garraioaren beharra aitortzen zaien bezala, landa eremuetako bizilagunek gure ibilgailuetan gure lanetara joateko premia bera dugula aitortu behar zaigu", esan dute
Garraio publikoa eskasa
Landa eremuetan bizi direnek salatu dute eskualde garraioaren maiztasuna ez dela nahikoa: "Gasteizko barne garraioaren maiztasunak 5 eta 20 minutukoak dira gehienez; gure kasuan, ordea, autobusak ordubetetik behin datoz", azaldu dute. Gainera, auzo periferikoetan autoa utzi eta garraio publikoa hartzea "denbora bikoiztea eta auzoak ibilgailuz betetzea" dakarrela gaineratu dute, "ingurumen onurarik gabe".
Horregatik eskatzen dute gaur egun herrialdean dagoen mugikortasun arazoari "irtenbide erreala" emango dieten neurriak ezartzea, "hala nola eskualdeko garraio zerbitzuen maiztasuna eta ibilbideak hobetzea edo lanerako joan etorrien kudeaketa koordinatua egitea bi erakundeen artean".