Duela bi aste, Artepan okindegiak eta Kromatiko jatetxeak Crunafah izeneko croissant solidarioa aurkeztu zuten, Gazako haur eta familiei laguntzeko helburuarekin. Ekimen horrek indar berria hartu du, Askatasun doinua ipuin solidarioa batu zaio proiektuari.
Liburua eskuragarri dago Artepan denda guztietan, eta salmenta bakoitzeko 12 euro zuzenean bideratuko dira Global Humanitaria GKEra. Ipuinak Gaza eta Zisjordaniako haurrek bizi duten errealitatea kontatzen du, musikaren bidez beren emozioak eta sufrimendua adieraziz. Helburua da honen bidez haurrek enpatia, kulturartekotasuna eta elkartasuna lantzea.
Mitxel Elortzak idatzi eta Mariñe Jauregik ilustratu duen lan honek musika eta artea askatasunaren adierazpen gisa aldarrikatzen ditu, haurrak beti erdigunean jarriz.
Liburuaz gain, Crunafah gozokia azaroaren 16ra arte egongo da eskuragarri Artepan eta Mamia denda guztietan. Croissant bakoitzeko hiru euro Global Humanitariari emango zaizkio, Gazako familientzako janari saskiak erosteko.