Atzo hasitako bidean segituko du asteazkenak: hodeiak eta ostarteak izango ditugu, eta gauarekin batera hodeitza dezente handituko da, euri zaparradekin. Hegoaldetik ufa egingo du Eolok, eta zenbaitetan bolada gogorrak izango ditu. Hori dela eta, Euskametek abisu horia eman du, 100 km/h-ra arteko boladak iragarrita. Termometroetan, 10 eta 17 gradu artean mugituko da galinstanoa.
Beste horrenbeste espero da ostegunerako, zeru hodeitsuekin eta noizean behineko zaparradekin. Oraingoan haizeak mendebaldetik egingo du, bolada gogorrak mantenduta, baina, informazio hau idaztean bederen, oraindik ez dute abisu horirik eman. Beherantz joango dira tenperaturak, 7 eta 17 gradu arteko aldearekin.