Gasteizko Udalaren adibideari jarraiki, Arabako Foru Aldundiak Turismo Adimendunaren Plataforma izeneko proiektua martxan jarriko du, eta 1.950.000 euroko aurrekontua bideratu du horretarako, Europako Batasuneko NextGenerationEU funtsen bidez finantzatuta, irailaren 30ean egindako Foru Gobernuko Kontseiluan onartu dute egitasmoa.
Besteak beste, une eta leku bakoitzera egokitutako narratibak eskainiko ditu zerbitzuak, audio, bideo, testigantza eta ikus-entzunezko baliabideekin.
Halakoetan gertatu ohi den moduan, bisitariaren portaeraren behaketa egiten ahaleginduko dira, turistek egiten dituzten ibilbideak, lehentasunak eta egonaldi denborak aztertuz. Horrez gain, inkestak, online erreputazioaren neurketa, gogobetetze maila eta hobekuntza proposamenak jasoko ditu plataformak. Aplikazio, QR kode, laguntzaile birtual, sentsore edo pantaila interaktiboekin aktibatuko dira edukiak.
Bisitariaren datuei dagokienez, honakoak bildu nahi dituzte: profila, iristeko modua, bisitaren maiztasuna, interesak eta elkarrekintza digitalaren maila. Besteak beste, "espazioan izandako portaera" ere jasotzen saiatuko dira: egonaldi denborak, interes gehien piztu duten tokiak, edota Araban zehar egindako ibilbidea.
"Eredu honek ondare-turismoaren produktuaren ulertze integrala errazten du, neurgarria, ebaluagarria eta hobegarria den esperientzia gisa", dio lizitatuko duten kontratuaren agiriak.
