Gasteizko Udalak eta Arabako Foru Aldundiak osatutako Larrialdietarako Arabako Funtsak (LAF) 50.000 euro bideratuko ditu Gazako Zerrendan desnutrizio larriko egoeran dauden bi urtera arteko haurrei premiazko elikagaiak emateko. Gazako palestinarrak, bereziki haurrak, gosete larria eta gaixotasunak jasaten ari dira Israel eremu horretan egiten ari den genozidioaren ondorioz.
Unicef Haurren Laguntzarako Nazio Batuen Funtsak bideratuko du bi administrazioen laguntza ekonomikoa eta desnutrizio larria duten bi urtetik beherako haurrei pisua hartzen lagunduko dien elikadura terapeutikoa emango die. Haur bat desnutrizio akutu larriko egoerara iristen denean elikadura terapeutikoa behar du, eta horrek pisua hartzen lagunduko dio tratamenduarekin jarraitu ahal izateko. Jateko gogoa berriz sentitzen lagunduko dio ere desnutrizio maila horretan gorputzak elikagaiak onartzeari uzten baitio.
Hiltzeko arriskua
Gazako biztanleriaren ia %90 lekuz aldatu da, eta familien eta, bereziki, haurren zaurgarritasuna handitu egin da. Gazako Zerrendako bost haurtxotik bat garaia baino lehenago edo pisu txikiarekin jaiotzen da orain; izan ere, desnutrizioaren larriagotzeak eta osasun eta saneamendu zerbitzuen kolapsoak muturreko arriskuan jartzen dituzte jaioberriak eta amak.
Testuinguru horretan, beharrezkoa da horniduren eskuragarritasuna bermatzea desnutrizio akutua duten adingabe horiei arreta emateko. Hornidurak berehala eskura izatea funtsezkoa da haien biziraupena bermatzeko, batez ere desnutrizio larria duten kasuetan; izan ere, tratamendu egokirik gabe, haur horiek bederatzi bider aukera handiagoa dute hiltzeko, nutrizio egoera normal batean baino.