Uztailaren 11tik 31ra arte egingo dute Urmuga mendi ibilaldi musikatuaren seigarren aldia. Euskal Herria mendebaldetik ekialdera mendiz mendi zeharkatuko dute 21 etapatan, hainbat txokotan musikak girotuta. Arabako Gorobel mendilerroan hasi, eta Urdatxen (Zuberoa) amaituko da.
Lehendabiziko etapa Urduñan amaituko da, eta larunbatean Araban izango da kontzertua, Garrastatxun (Baranbio). 18:30etik aurrera, Alaitz eta Maider, Leturia eta Irati Arzelus, Anje Duhalde, Et Incarnatus Orkestra, Fede de Dios eta Pirata musikariak arituko dira zuzeneko emanaldian. Sarrerak 20 euro balio du eta urmuga.eus webgunean eros daitezke.
Mendi ibilbidea
Ibilbide nagusia, 21 egunetakoa, Felipe Uriarte mendizalearen gidaritzapean egingo dute, eta parte hartu nahi dutenek Urmugako webgunean eta sare sozialetan eman dezakete izena, baina edozein herritatik ere batu daitezke ibilbide horretara.