Arabako Foru Aldundiko Mahastizaintza eta Enologia Zerbitzuak ohartarazi du aurtengo kanpainan mildiu onddoak eragin ekonomiko "nabarmena" izango duela, onddoaren intzidentzia aurreko urteetan baino askoz ere handiagoa izaten ari delako. Eragina batez ere Arabako Errioxako ardoetara mugatuko da, eta ez, horrenbeste, Aiaraldeko txakolinera.
Azaldu dutenez, apirilean eta maiatzean izandako tenperaturek eta prezipitazioek bereziki lagundu dute mahastietako gaixotasun hau hedatzen. Prezipitazio gehiago izanik, onddoak bidea izan du aiseago zabaltzeko eta laboreei erasateko.
Are, hezetasun erlatibo handiak eta behe laino iraunkorrek bigarren zabalpen bat erraztu dute. Afekzioak desberdinak dira eremuaren arabera, %10 izatetik %70-80 izatera pasatuz. Batez ere Ebro ibaiaren ertzetan eta ibarretan kalteak sortzen ari dira, altitude garaiagoetan dauden mahastietan kaltea txikiagoa izanik.
Eskualdeko nekazariek asteak daramatzate esaten aurten onddoa errotik sartu dela, eta fitosanitarioekin ohi baino tratamendu gehiago egitera behartuta daudela, kostuak handituz. Nekazaritza ekologiko izenekoan lan egiten dutenentzat, berriz, egoera are larriagoa izan daiteke, onddoaren kontrako tratamendu eraginkorrik ez daukatelako, lursail osoak galtzeko arriskuarekin.