Atzo arratsaldean irekitako bideari jarraiki, aste berria zeru hodeitsuekin eta zaparrada trumoitsuekin hasiko da. Arratsaldeko seiak arte abisu horia eman dute, prezipitazio handiagatik: ordubetean 15 l/m² baino gehiago pila daitezke. Iparretik joko duen haize ahul-bizia izango dugu, bereziki arratsaldean bolada gogorrak har ditzakeena. Termometroetan 12 eta 19 gradu arteko tenperaturak izango dituzte hiriburuan.
Egoera bihar goizera arte mantenduko da gutxienez, zaparrada txiki edo ertainekin, baina ondoren hodeiak gutxitu daitezkeela dio Euskalmetek. AEMETek ez du horren argi, eta, momentuz, euria izateko probabilitateak %100ean mantentzen du astearte osorako. Haizea zein tenperaturak bere horretan egongo dira, ipar osagaiko haizearekin eta 12-19 gradu arteko alde termikoarekin.